काठमाडौँ — थाइल्यान्डका राजा महा भाजिरालोङकोर्णले पूर्वप्रधानमन्त्री थाक्सिन सिनावात्रालाई आममाफी दिएका छन् । थाई राजाले आफ्नो जन्मदिनको अवसरमा ७ हजार ५ सय जनालाई आममाफी वा सजाय घटाउने निर्णय गरेका हुन् । तीमध्ये ७५ वर्षीय धनाढ्य पूर्वप्रधानमन्त्री सिनावात्रा एक हुन् ।
थाक्सिन १५ वर्षको निर्वासनपछि २०२३ को अगष्टमा थाइल्यान्ड फर्केका थिए । त्यसको एक दिनपछि उनलाई भ्रष्टाचार र शक्तिको दुरुपयोग गरेको अभियोगमा ८ वर्षको जेल सजाय सुनाइएको थियो ।
तर राजा भाजिरालोङकोर्णले उनको सजाय कटौती गरी एक वर्षमा सिमित गरिदिएका थिए । तर बुढ्यौली र खराब प्रतिकूल स्वास्थ्यका कारण उनलाई आवश्यक परेको समयमा उपस्थित हुने शर्त (पेरोल) मा रिहा गरिएको थियो ।
बैंकक पोष्टका अनुसार थाक्सिनका वकिल विनयात चार्टमोन्त्रीले थाक्सिनलाई राजाले आममाफी दिएका र उनको पेरोल आइतबार अन्त्य हुने बताएका छन् । ‘शाही घोषणामार्फत् आममाफी पाउने हजारौं थाई नागरिकमध्ये पूर्वप्रधानमन्त्री सिनावात्रा एक हुनुहुन्छ,’ उनले भनेका छन् ।
शनिबार प्रकाशित शाही राजपत्रमा ‘राजाले माफी पाएका सबैजनालाई सुध्रने र देशका लागि केही गर्ने मौका दिएको’ उल्लेख छ । थाई राजाले गत जुलाई २८ मा आफ्नो ७२ औं जन्मदिन मनाएको करिब एक महिनापछि असल आचरण भएका कैदीहरूलाई माफी दिइएको हो । यसअघिको शाही आदेश अनुसार पूर्वप्रधानमन्त्री सिनावात्राले अगष्ट ३१ मा आममाफी पाउने बताइएको थियो ।
थाक्सिनकी छोरी पेतोङतार्न सिनावात्रालाई शुक्रबार मात्रै थाइल्याण्डको प्रधानमन्त्री निर्वाचित भएकी थिइन् । संसद्मा शुक्रबार भएको मतदानमा पेतोङतार्नले ३१९ मत ल्याएकी थिइन् भने विपक्षमा १४५ मत परेको थियो । उनको सत्तारोहणसँगै थाक्सिनले तत्काल आममाफी पाएका हुन् ।
३७ वर्षीया पेतोङतार्न थाइल्याण्डकी हालसम्मकै सबैभन्दा कान्छी प्रधानमन्त्री हुन् । सन् २०२१ मा फेउ थाई पार्टी प्रवेश गरेकी पेतोङतार्न २०२३ अक्टुबरमा पार्टी प्रमुख बनेकी थिइन् । त्यसअघि उनको परिवारबाट काकी यिङ्गलक र बुबा थाक्सिन थाइल्याण्डको प्रधानमन्त्री भएका थिए ।